百萬富翁殺機版（下）
上集：https://bit.ly/2HVaGQA
「加油」嘅聲音漸漸散去，我極度專注，用最快嘅速度答題。
五十題過去，我答啱晒。
「恭喜你成為『百萬富翁殺機版』嘅贏家，誠邀你加入『人生勝利組』，請前行一百步，左轉......」
我按捺住心中嘅狂喜，甚至唔敢通知同事，怕被對方發現，我照住指示搭車，入咗一棟大廈嘅地下室。
路上，我無遇到任何障礙，我估對方已經喺大廈嘅Cam度，確定我係一個人入嚟，先咁順暢。
地下室裡只有一部電腦同一個大屏幕，屏幕開緊視像會議，屏幕內有一個鬍鬚男：「歡迎！你係第一個贏家。」
「第一個？乜其他人都贏唔到咩？」我努力扮到好高傲。
鬍鬚男哈哈大笑：「唔好話50題，大部份人連35題都唔得，我都話世界上有好多垃圾！」
原來，鬍鬚男係一個IT天才，佢認為世上好多人尸位素餐，連自己嘅本職工作都做唔好。
呢啲劣質嘅基因，唔應該流傳落去。
於是，佢研發咗一個系統，Hack入人體內嘅晶片，設定合適嘅問題，並控制佢哋嘅呼吸系統，開始咗呢場「百萬富翁殺機版」。
鬍鬚男決定邀請我呢啲「有智慧嘅人」，共建一個更美好嘅世界。
我假意應承，一離開呢度，就報告上司。
雖然鬍鬚男好狡猾，無真正出現，但上司都係IT專家，加埋一班特工輔助，得到呢條線索，就順籐摸瓜，搵到鬍鬚男嘅下落，鬍鬚男企圖逃跑而被殺。
普世歡騰，上司同我都因此升職，受到讚譽。
我唯一嘅疑惑係，所有報導都係話，鬍鬚男用咗奇異嘅IT技術搞呢單嘢出嚟，但完全無提過人體晶片嘅問題。
上司話，呢件事會引起恐慌，所以唔講得。
我當時無深咎，但之後都會留意吓各地嘅死亡人數。
我發現，雖然「百萬富翁殺機版」消失咗，但各地莫名其妙死去嘅人數，依然無少到，只係大部份都喺睡夢中死去，無引起大家嘅注意。
我忍唔住問上司：「當日鬍鬚男研發咗Hack晶片殺人嘅系統，你話會引起恐慌，無上報到，依加個系統去咗邊？」
「銷毀咗。」上司答得輕描淡寫。
我拎出我收集嘅資料，質問上司：「點解咁多人猝死？尤其係啲智力有問題嘅人，幾乎死得七七八八......」
講咗一大輪，上司終於承認，佢拎咗控制晶片嘅系統。
上司冷笑：「世上有咁多蠢人廢人，點解仲要生存？」
上司嘅做法，係直接利用晶片收集嘅資訊，判斷對方值唔值得生存。
如果被判斷為「無價值」，晶片就會趁人進入睡眠狀態後，截斷某啲生理機能，令人死亡。
上司微笑：「我睇你都係聰明人，不如一齊建立更美好、無蠢人嘅世界啦。」
「你唔駛旨意！」我好嬲，加多一句：「我嚟搵你之前，已經將呢啲資料備份畀朋友，就算你殺咗我，資料都會公開。」
上司笑住搖搖頭：「你所謂嘅『資料』，就係呢排猝死嘅人多咗，So what？年年都有人死啦，呢件事根本無咩人關注。」
上司喺電腦上撳咗幾下，我開始透唔到氣，好明顯，佢透過控制我嘅晶片，殺我滅口。
我勉力支撐身體，但意識愈嚟愈模糊。
上司嘅聲音喺耳邊響起：「你放心去啦，我唔會好似嗰個傻仔咁，搞咩問答遊戲，令到人心惶惶。」
點解我哋當日捉到鬍鬚男，但捉唔到......甚至無人諗過去捉我上司？
因為鬍鬚男嘅「百萬富翁殺機版」，搞到人心惶惶，大家一定會諗辦法應對，哪怕佢係天才，都無法戰勝全球團結嘅力量。
上司喺驚動最少人嘅情況下殺人，於是，只要未輪到自己，大家都以為死嘅人只係意外，只係身體唔好。
邪惡，可以係屍橫遍野、驚天動地，
但最致命嘅邪惡，叫做不經不覺。
－完－
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #百萬富翁殺機版
Search